Eko-vriendelike staproetes
     Twee staproetes is gevestig in die bewaringsgebied met Goedehoop as die sentrale fokuspunt. Deskundiges van die Departement van Ekologie aan die Universiteit van Pretoria het die roetes uitgelê na deeglike oorweging van die omgewingskenmerke van die gebied en die behoeftes van jonk en oud, avontuurlistiges en selfs die dapperes is in ag geneem. Die roetes is almal geakkrediteer by die Suid-Afrikaanse Staproete Eienaarsvereniging (SATOA).

     Die Ghoya staproete
Hierdie dag staproete van sowat 10 kilometer begin by die Goedehoop gastehuis en is handgemaak vir dagbesoekers wat die natuurlike skoonheid van die bewaringsgebied wil ontdek. Eers word daar op Aalwyn koppie verpoos vanwaar jy ’n uitsig oor die grootste deel van die bewaringsgebied kan geniet. Hiervandaan word daar na die historiese Ghoya korbeulkliphutte geloop. Midagete word onder by die hengelkol langs die spruit geniet waar ’n ete aan u voorsien kan word (of self saam geneem kan word). Die roete loop terug na die gastehuis al langs die spruit.

     Die Springbok staproete
Hierdie aangename staproete van net meet as vyf kilometer kronkel deur ’n klein vallei vanaf die Goedehoop gastehuis. Dit loop dan verder na ’n heuwel waar rustig gesit kan word om die asemrowende uitsig oor die bewaringsgebied in te neem. Die roete loop dan terug na die gastehuis deur ’n gebied wat veral deur vlaktewild verkies word. Dit als terwyl die legendariese Vegkop al in die verte aanwesig is.