Die Ghoya Afrika bewaringsgebied is gewortel in die opwindende diversiteit van ons land en het baie kleurryke verhale om te vertel. Bewoning van die gebied dateer terug tot die laat ystertydperk. Vandag nog kan die korbeelkliphutte van die Nghoya stam, ’n etniese volk uit daardie tydperk, aangetref word waar dit verspreid voorkom oor die heuwels van die bewaringsgebied. Dit is aan hierdie unieke argeologiese erfenis waaraan die bewaringsgebied sy naam ontleen.
 

Toe die Voortekkers teen die middel van die negentiende eeu die omgewing van die bewaringsgebied bereik het, was dit bewoon deur nomadiese Barelong- en Matabele beesboere. Die naby geleë terein waar die slag van Vegkop plaasgevind het in 1836 herhinder mens aan daardie tye toe die stryd om natuurlike hulpbronne tot hierdie bekende geveg gelei het - een van die vroeë verhale van die vestigings geskiedenis van blankes in die Suid-Afrikaanse binneland

     Die oorvloed en rykdom van die Ghoya omgewing is goed gedokumenteer. In die memoirs van Paul Kruger, destydse president van die Zuid Afrikaansche Republiek, beskryf hy sy eerste leeujag in die koppies en heuwels rondom die Renosterrivier wat deur die bewaringsgebied loop.
     In 2001 het Danie Hattingh van die plaas Goedehoop die bewaringsgebied in samewerking met ander plaaslike boere en grondeienaars gestig met die oog gerig op die bewaring van hierdie ryk erfenis van kultuur, natuur en geskiedenis. Dit het as’t ware ’n nuwe hoofstuk begin waaruit nog vele stories sal voortvloei.
     Die renaissance wat dit in hierdie deel van die Riemland sal voortbring spruit uit ’n diepgewortelde liefde vir en begrip van die omgewing, sy geskiedenis en alles wat daarop lewe. Weldeurdagte programme om die natuurlike skoonheid van die omgewing te laat herleef en nougesete reataurasie van die elegante opstal en geboue het die plaas Goedehoop sy eerstydse glorie laat herwin.
Vandag bied die asemrowende omgewing die ideale agtergrond vir ’n viering van die fyner dinge in die lewe.